काठमाडौँ – सैनिक मुख्यालय जङ्गीअड्डाको गेटमा भावी सरकारको नेतृत्वमा आ-आफूले चाहेका नाम लिँदै वादविवाद गर्न थालेपछि सेनाले जेन-जी समूहलाई फर्काइदिएको छ ।

सैनिकले माइकिङ गर्दै भोलि (बिहीबार) बिहान सम्पर्कमा आउन भनेका छन्‌ । सेनाले भोलि बिहान नेतृत्वकर्ताको नाम र फोन नम्बरसहित सम्पर्क गर्न भनेको छ ।

जेन-जीहरूको भर्चुअल बैठकले पूर्वप्रधानन्यायाधीश सुशीला कार्कीको नाममा सहमति जुटाएपनि भद्रकाली पुगेका विभिन्न समूहले आफूले अघि सारेकै व्यक्तिले आगामी सरकारको नेतृत्व गर्नुपर्ने भन्दै हुटिङ र नाराबाजी गरेका थिए ।

पूर्वप्रधानन्याधीश कार्कीलाई अन्तरिम सरकारको प्रधानमन्त्री बनाउने सहमति गरेर जेन-जी प्रतिनिधि नेपाली सेनाको मुख्यालय भद्रकालीमा प्रधान सेनापतिसँग कुराकानी गर्न हिँडेका थिए । तर, त्यहाँ भिड जम्मा भइसकेको थियो । भीडका विभिन्न समूहले विभिन्न व्यक्तिको नाम लिएर चर्काचर्की गरे ।

त्यहाँ धरान उपमहानगरपालिकाका मेयर हर्कराज साङपाङ र काठमाडौँका मेयर बालेन्द्र साहको नाम लिएर उनीहरू भनाभनमा उत्रिएका थिए । केही युवाहरूले अन्तरिम सरकार प्रमुखमा सुशील कार्की मान्य नहुने भन्दै नाराबाजी गरेका थिए ।