काठमाडौँ – जेन-जी प्रदर्शन चर्किएपछि सरकारले त्रिभुवन अन्तरराष्ट्रिय विमानस्थलका कर्मचारीहरूलाई भीभीआइपी सवारी व्यवस्थापनका निम्ति भन्दै हाइ अलर्टमा बस्न निर्देशन दिएको छ ।

सोमबार भएको जेन-जी प्रदर्शनका क्रममा सरकारले निर्मम दमन गर्दा १९ जनाको ज्यान गएको छ भने सयौँ घाइते छन् । सरकारी दमनविरुद्ध मङ्गलबार चर्किएको आन्दोलनका क्रममा नेताका निजी निवास र पार्टी कार्यालयमा आक्रमण हुन थालेपछि विमानस्थल प्रशासनले यस्तो निर्देशन दिएको विमानस्थलमा कार्यरत एक अधिकृतले जानकारी दिए ।

उनले भने, ‘अनौपचारिक निर्देशन आएको छ, सम्भवतः नेताहरूले काठमाडौँ असुरक्षित देखेर अन्तत्र जान खोजेकाले यस्तो निर्देशन आएको हुन सक्छ, भीभीआइपीको सवारीचाप पर्न सक्ने हुनाले हाइ अलर्टमै बस्न भनिएको छ ।’