काठमाडौं– एउटा विद्यालयको कक्षाकोठामा हालै पूर्वी पाकिस्तानमा आएको बाढीबाट विस्थापित भएकाहरुलाई उद्धार गरी बनाइएको छ । यो शिविरमा गर्भवती महिलाहरु पनि छन् ।

लाहोरनजिकै चुङ क्षेत्रमा रहेका आफ्ना घरमा पानीको स्तर कहिले घट्छ र फर्कौँला भनेर उनीहरु कुरिरहेका छन् । यहाँ रहेका महिलाहरु स्यानीटरी प्याड र गर्भवती भएका बेला चाहिने स्याहारसँगै अन्य अत्यावश्यक औषधिको पहुँचबाट पनि टाढा छन् ।

शुमाइला रियाज १९ वर्षकी भइन् । अहिले उनको पेटमा ७ महिने भ्रुण हुर्किरहेको छ । पछिल्लो चार दिनदेखि उनी गर्भावस्थाको पीडा सहँदै उद्धार शिविरमा बसिरहेकी छिन् ।

‘म हुनेवाला सन्तानबारे सोच्न चाहन्छु तर मेरै भविष्य अनिश्चित छ ।’ समाचार संस्था एएफपीसँग उनले भनिन् ।

यी महिलाहरु यस विद्यालयमा २ हजारभन्दा धेरै विस्थापितहरुसँगै बसिरहेका छन् । उनीहरुले लगाएका कपडा मैला छन् । उनीहरुको कपाल जिङ्ग्रिङ्ग परेका छन् ।

‘मेरो शरीर साह्रै दुख्छ र चाहेको औषधि मैले भेटेकी छैन ।’ १९ वर्षीया फातिमाले भनिन् । एक वर्षीया छोरीकी आमा उनी अहिले ४ महिने गर्भवती छिन् ।

‘म चाहेअनुसार खान्थेँ, चाहेअनुसार सुत्थेँ, चाहेअनुसार हिँड्थेँ । अहिले केही गर्दिनँ । म यहाँ केही गर्न सक्दिनँ ।’ आफ्नो वास्तविक नाम प्रयोग नगर्न अनुरोध गर्दै फातिमाले एएफपीसँग भनिन् ।

पछिल्लो साताको वर्षाका कारण पाकिस्तानको कृषिभूमि मानिने पञ्जाब प्रान्तका तीन प्रमुख नदीमा जलसतह बढेको छ । प्रान्तकी वरिष्ठ मन्त्री मरियम औरङ्गजेबका अनुसार बाढीबाट पञ्जाबमा २० लाखभन्दा धेरै मानिसहरु प्रभावित भएका छन् ।

७ लाख ५० हजारभन्दा धेरै मानिसहरुलाई उद्धार गरिएको छ । यीमध्ये १ लाख १५ हजारलाई डुङ्गाबाट उद्धार गरिएको । यस विपदलाई पाकिस्तानको इतिहासकै सबैभन्दा ठूलो उद्धार अभियान ठानिएको छ ।