ललितपुर- नेकपा एमालेका अध्यक्ष एवम् प्रधानमन्त्री केपी शर्मा ओलीले पार्टीमा अराजकता बढ्दै गएको गुनासो गरेका छन् ।

पार्टीको दोस्रो विधान महाधिवेशन उद्घाटन समारोहलाई शुक्रबार ललितपुरको गोदावरीमा सम्बोधन गर्दै ओलीले यसो भनेका हुन् ।

विरोधीले केही नभेटेपछि अफवाह फैल्याउने काम गरिररहेका बेला पार्टीमा पनि अनुशासनहीनता बढ्दै गएको जिकिर ‌ओलीले गरेका हुन् ।

‘अहिले पार्टीमा अनुशासनको कमी भएको छ । कार्यकर्ताहरूमा पनि बेलगाम हुन पाए, अराजक हुन पाए हुन्थ्यो भन्ने भएको छ’, उनले भने, ‘आफूप्रति उदारता र अरुप्रति कडा हुने चलन बढेको छ । अनुशासनका कुरा, आचरणका कुरा पार्टीसँग जोडिएका छन् । यसमा तपाईं हामी सबैले ख्याल गर्नुपर्ने भएको छ।’

ओलीले विरोधीले केही नभेटेपछि अफवाह फैल्याउने काम गरेको पनि बताए । आफ्नो स्पेन भ्रमणदेखि लिएर हालैको चीनद्वारा तयार गरेको ग्लोबल सेक्युरिटी इनिसियटिभ (जीएसआई) सम्मका विषयमा विपक्षीले तथ्यहीन प्रचार गरेको दाबी ओलीले गरे।

‘हामीले राष्ट्रको शीर माथि उठाउँदा विरोधीहरूलाई पोल्छ, अनि एक अम्खोरा पानी पिउँछन् घट्घटी,’ ओलीले भने।