काठमाडौं- अमेरिकाको एआई कम्पनी ओपनएआईले भारतमा विशाल डेटा सेन्टर बनाउने भएको छ । स्टारगेट ब्राण्डको एआई पूर्वाधार निर्माण गर्नका लागि ओपनएआईले भारतलाई छानेको हो ।

हाल यस कम्पनीले भारतमा स्थानीय साझेदार खोजिरहेको ब्लूमबर्गले जनाएको छ । ओपनएआईले १ गिगावाट क्षमताको डेटा सेन्टर निर्माणको तयारी गरिरहेको जनाइएको छ ।

ओपनएआईको यस डेटा सेन्टर भारतकै सबैभन्दा ठूलो हुनसक्ने अनुमान गरिएको छ । भारतमा माइक्रोसफ्ट, अल्फबेटको गुगल कम्पनी र एशियाका धनाढ्य मुकेश अम्बानीले पनि यस्तै पूर्वाधार निर्माणका लागि भारतमा लगानी गरेका छन् ।

ओपनएआईको नयाँ परियोजना स्थान र समयसीमा भने अझै स्पष्ट भइसकेको छैन । कम्पनीका प्रमुख कार्यकारी अधिकृत साम अल्टम्यानले यसै महिना भारत भ्रमणका क्रममा नयाँ डेटा सेन्टरबारे घोषणा गर्ने अपेक्षा गरिएको छ ।

पछिल्लो समय भारत र अमेरिकाबीच व्यापारका विषयमा तनाव चुलिरहेका बेला ओपनएआईको नयाँ योजना सार्वजनिक भएको हो । अमेरिकी राष्ट्रपति डोनाल्ड ट्रम्पले भारतमाथि ५० प्रतिशत भन्सार शुल्क लगाएका छन् ।

ओपनएआईका प्रतिनिधिले भारतमा नयाँ पूर्वाधार निर्माण गर्ने विषयमा टिप्पणी गर्न अस्वीकार गरेको ब्लुमबर्गले जनाएको छ ।

ओपनएआईले अमेरिकामा ५ खर्ब अमेरिकी डलर बराबर स्टागेट परियोजना घोषणा गरेको छ । यसका लागि कम्पनीले सफ्टबैंक र ओराकलसँग साझेदारी गरेको छ ।