काठमाडौं – ‘जहाजैमा’मा अलपत्र पारेर निर्देशक कृषा चौलागाईंले नयाँ फिल्म ‘पारस’ निर्मााणको घोषणा गरेकी छन् । उनले आफ्नो जन्म दिन पारेर बिहीबार यो फिल्मको घोषणा गरेकी हुन् ।

गत वर्षको चैतमा अन्तिममा कृषाको निर्देशन रहेको फिल्म ‘पिताम्बर’ प्रदर्शनमा आएको थियो । गत जेठमा उनले फिल्म ‘जहाजैमा’ निर्माण घोषणा गरेकी थिइन् ।

यो फिल्ममा कलाकार अनुबन्धको विषयलाई कृषाको टिमले निकै प्राथमिकताका साथ प्रचार गरेको थियो । तर, आन्तिरिक कारणले ‘जहाजैमा’ तत्काल नबन्ने भएको बुझिएको छ । यस फिल्मबाट नायक सौगात मल्ल बाहिरिएका छन । अन्य कलाकारहरु पनि फिल्म छोड्ने तयारीमा रहेको बुझिएको छ ।

यहीबीचमा कृषाले ‘पारस’ घोषणा गरेपछि ‘जहाजैमा’ तत्काल नबन्ने प्रष्ट भएको छ । यसको छायाङ्नक फागुनबाट सुरु हुने बताइएको छ ।

कृषाका अनुसार ‘पारस’ एक्सन र लभस्टोरीको मिश्रण हो । कलाकार चाँडै चयन गरेर सार्वजनिक गर्ने उनले बताइन् ।

केपी फिल्मस्को ब्यानरमा बन्ने यस फिल्मको निर्माता कृषाकै भाइ विशाल चौलागाईं हुन् ।