काठमाडौं– राष्ट्रिय मुक्ति पार्टीका अध्यक्ष राजेन्द्र महतोले लुटतन्त्र जोगाउनका लागि कांग्रेस र एमाले मिलेर सरकार बनाएको बताएका छन् । 

मंगलबार विराटनगरमा सञ्चारकर्मीसंग कुरा गर्दै महतोले ठूला दुई दल मिलेर सरकार बनाउने अभ्यास नभए पनि लुटतन्त्र जोगाउनका लागि नै कांग्रेस र एमाले मिलेर सरकार बनाएको बताएका हुन् । 

उनले दुई दलले देशमा लुटतन्त्र मच्चाएको आरोप लगाए  । महतोले संविधान संशोधन गर्न इच्छा दुई दलमा नरहेको समेत धारणा राखे । ठूला दलले देशमा अराजकताको सीमा पार गरिसकेको उनको भनाइ छ । 

उनले अधिकार पहिचानका साथै सुशासन समृद्धिका क्षेत्रमा सरकार असफल भएकाले अव देशलाई जोगाउन सबै एकठाउँ आउनुपर्ने बेला आएको धारणा राखे । 

अध्यक्ष महतोले नेपालको सीमामा हस्तक्षेप हुँदा पनि सरकारले कूटनीतिक दबाब दिन नसकेको जिकिर गरे  । चीनको ग्लोबल सेक्युरिटी इनिसियटिभ्स (जिएसआइ) मा नेपालको समर्थन गरेको भन्ने बाहिर आएको भन्दै उनले यसबारे प्रधानमन्त्रीले यस विषयमा स्पष्ट पार्नुपर्ने बताए ।