काठमाडौं- पाँच राष्ट्रबीचको टी–ट्वान्टी क्रिकेट सिरिज अन्तर्गत नेपालले आज (आइतबार) पहिलो खेल खेल्दैछ ।

ओमानकाे अल अम्रेट क्रिकेट मैदानमा हुने खेल नेपाली समय अनुसार दिउँसो पौने ३ बजेबाट शुरु हुने५ । हङकङको सामना गर्दै नेपालले सिरिजको शुरुवात गर्न लागेको हो ।

हङकङविरुद्ध मैदान उत्रिँदा नेपाल सुखद शुरुवात गर्ने लक्ष्यमा हुनेछ । हङकङ पनि पहिलो जितको खोजीमा रहनेछ । पहिलो खेलमा ओमानसँग ७ विकेटले पराजित हङकङ पनि नेपाललाई हराउने योजनामा हुनेछ ।

हङकङपछि नेपालले सोमबार नेदरल्याण्डको सामना गर्नेछ । ओमान क्रिकेटले आयोजना गरेको सिरिजमा नेपाल, आयोजक ओमान, हङकङ, नेदरल्याण्ड र टेष्ट राष्ट्र आयरल्याण्ड रहेका छन् ।

नेपाल र हङकङबीच हालसम्म ७ पटक टी-ट्वान्टी खेलमा प्रतिस्पर्धा भएको छ । जसमा नेपाल ३ पटक विजयी भएको छ भने हङकङले ४ खेलमा जीत हासिल गरेको छ ।