एजेन्सी- स्पेनिस ला लिगा फुटबलमा शीर्ष स्थानको रियल मड्रिडले गएराति भएको खेलमा जित निकाल्दै शीर्ष स्थानलाई यथावत राखेको छ ।

शनिबार राति भएको खेलमा रियलले ग्रानडालाई ४–२ गोल अन्तरले पराजित गर्यो । घरेलु मैदानमा रियललाई जित दिलाउन करिम बेन्जिमा, इडेन हजार्ड, लुका मोड्रिच र जेम्स रोड्रीगेजले एक–एक गोल गरे ।

ग्रानडाका डार्विन माचिस र डोमिन्गोस दुआरटेले एक एक गोल फर्काए । खेलको दोस्रो मिनेटमा बेन्जिमाले गोल गर्दै रियललाई अग्रता दिलाए । खेलको ४५ औं मिनेटमा हजार्डले गोल गर्दै रियलको अग्रता २–० को बनाए ।

खेलको ६१ औं मिनेटमा मोड्रिचले गोल गर्दै रियललाई ३–० को अग्रता दिलाए । ६९ औं मिनेटमा ग्रानडाका डार्विनले पेनाल्टीमा गोल गर्दै खेल ३–१ मा ल्याए । खेलको ७७ औं मिनेटमा ग्रानडाका डोमिन्गोसले गोल गर्दा खेल ३–२ को स्थितिमा पुग्यो । तर, खेलको ९० औं मिनेटमा रोड्रीगेजले गोल गर्दै रियललाई ४–२ को जित दिलाए ।

जितसँगै रियलले शीर्ष स्थानको अग्रता कायम राखेको छ । रियलले ८ खेलमा १८ अंक जोडेको छ । रियलको यो पाँचौ जित हो । पराजित ग्रानडा ८ खेलमा १४ अंक जोडेर दोस्री स्थानमा छ ।