काठमाडौं- दशैं मनाउने उमंगसहित घर हिँडेका यात्रु अहिले बाटोमा भएको जामले सास्ती बेहोर्न बाध्य छन्।

वीपी राजमार्ग हुँदै जाने सवारीको संख्या बढेसँगै जाम पनि बढेको हो ।

कलंकी नागढुंगा भएर उपत्यका बाहिरने ठूला सवारीको जाम कम भएपनि साँगाको नाका भएर पूर्वी नेपाल जाने सवारीको संख्या बढी हुनुका साथै बाटो सानो भएकाले जाम धेरै भएको हो ।

जामका कारण धेरै यात्रा गर्न नसकिएको बताउँदै यात्रारत यात्रुले कतिबेला घर पुग्ने भन्ने अन्यौलता बढेको बताएका छन् ।

यात्रुलाई सकस

यात्रुको चाप बढेसँगै यातायात व्यवसायीले जोखिमपूर्ण रुपमा यातायातका साधन सञ्चालन गर्न थालेका छन् ।

काठमाडौंमा चक्रपथ तथा स्थानीय रुटमा चल्ने सवारी साधनलाई नै व्यवसायीले लामो रुटमा सञ्चालन गरेपछि दशैंका लागि हिँडेका यात्रुले जोखिम बढ्ने भन्दै चिन्ता गर्न थालेका छन् ।

काठमाडौंमा गुड्ने नेपाल यातायातलगायतका कम्पनीका छोटा र साना बस नै अहिले लामो दूरीको साधनका रुपमा गुडाइएको पाइएको छ ।

लामो दूरीका सवारी गुडाउने चालकले पनि आराम नगरी गाडी गुडाउँदा जोखिम बढेको यात्रुहरुले बताएका छन् ।

यता प्रहरीले भने सवारीको अवस्था हेरेर मात्र लामो दूरीमा चल्न दिएको भन्दै यस्ता सवारीको अनुगमन हुने र बीच बाटोमा चेक गरिने जनाएको छ ।

हेर्नुहोस् वीपी राजमार्गमा भएको जामका तस्वीर