काठमाडौं- बलिउडका चर्चित निर्देशक सुरज बडजात्या र सुपरस्टार सलमान खान बीचको सहकार्य लामो समयदेखि जारी छ। मैने प्यार किया, हम साथ साथ हैं, र हम आपके हैं कौन जस्ता हिट फिल्महरूमा उनीहरूले सँगै काम गरेका छन्। तर निर्देशक बडजात्याले अभिनेता सलमानको उमेरलाई ध्यानमा राख्दै उनलाई लिएर नयाँ र सकारात्मक सामग्री बनाउनु चुनौतीपूर्ण भएको बताएका छन्।

निर्देशक बडजात्या, राजश्री प्रोडक्सन्सका अध्यक्ष पनि हुन्। भारतीय  मिडिया पिङ्कभिल्लासँगको कुराकानीमा निर्देशक बडजात्याले  भने, “कहिलेकाहीँ केही कथाहरूलाई अगाडि बढाउन सकिँदैन। जबसम्म क्लाइम्याक्स मिल्दैन वा पात्रको वास्तविक भावनालाई बुझ्न सकिँदैन, तबसम्म फिल्म बनाउनु अर्थहीन हुन्छ,”।

उनले थपे, ‘मैले अहिलेसम्म जम्मा सातवटा फिल्म मात्र बनाएको छु, तर मैले एउटा निर्णय गरेको छु—जबसम्म म पूर्णरूपमा विश्वस्त हुँदैन, तबसम्म म कुनै फिल्म बनाउँदिनँ। मलाई खुसी छ कि सलमान भाई मेरो साथमा छन्। आज उनको उमेरमा उनीसँग मिलेर केही नयाँ र सान्दर्भिक सिर्जना गर्नु नै मेरो लागि सबैभन्दा ठूलो चुनौती हो।’

सलमान खानले पछिल्ला वर्षहरूमा थुप्रै फिल्महरू फ्लप भोगेका छन्, जसमा हालसालै रिलिज भएको ‘सिकन्दर’ पनि पर्छ।

तर, अभिनेता सलमान खान आगामी अवसरहरूप्रति आशावादी छन् र आफ्नो करियर उज्जवल बनाउन तत्पर छन्। मिडियामा आएका अघिल्ला रिपोर्टअनुसार, सूरज बडजात्या सलमानसँग एउटा एक्सन फिल्म बनाउन लागेका थिए, तर परियोजना अघि बढेन र अन्तत रद्द भयो।

उनीहरूले सँगै गरेको अन्तिम फिल्म ‘प्रेम रतन धन पायो’ थियो, जसमा कलाकारहरु सोनम कपूर, अनुपम खेर र स्वरा भास्कर मुख्य भूमिकामा थिए।

अन्त्यमा, बडजात्याले दर्शकहरूलाई सलमानप्रति सजिलो हुन आग्रह गर्दै भनेका छन्, ‘उनी छिट्टै पुनः एकदमै ठूलो रूपमा फर्कन लागेका छन्।’