एजेन्सी – भारतीय कांग्रेसका नेता तथा लोकसभाका प्रमुख प्रतिपक्षी नेता राहुल गान्धीले भारतमा चुनावको मिति निर्वाचन आयोगले नभइ सत्तारुढ भारतीय जनता पार्टी (भाजपा) ले तोक्ने गरेको आरोप लगाएका छन्‌ ।

बिहारमा मतदाता अधिकार यात्रा निकालिरहेका गान्धीले मधुबनीमा आयोजित जनसभामा त्यहाँको चुनाव आयोगमाथि सङ्गीन आरोप लगाएका हुन्‌ ।

‘महाराष्ट्र र हरियाणाको चुनाव आउन लाग्दा सबैभन्दा पहिले मतदानको मिति बदलिन्छ, निर्वाचन आयुक्त कसलाई बनाउने भन्ने निर्णय प्रधानमन्त्री (नरेन्द्र मोदी) ले लिन्छन्‌ । त्यहाँ विपक्षीका नेता भए पनि त्यस्तो निर्णय गर्न रोक्न सक्दैनन्‌,’ गान्धीले भने ।

यसअघि गान्धीले भाजपामाथि मत चोरी गरेको आरोप लगाएका थिए । मतदानमा धाँधली गर्ने गरेकै कारण भाजपा आउँदो ५० वर्षसम्म पनि सत्तामै रहने उनको भनाइ थियो ।

उनले भने, ‘संविधानमा हरेक भारतीयलाई मतदान अधिकार रहेको उल्लेख छ, तर हामीसँग कुनै अधिकार बचेको छैन ।’

बिहारको सासारामबाट सुरु भएको राहुलको गान्धी यात्रा मङ्गलबार मधुवनी पुगेको थियो । उक्त यात्रामा विकासशील इन्सान पार्टीका संस्थापक मुकेश सहनी पनि सहभागी थिए ।

यो यात्रामा तेलङ्गानाका मुख्यमन्त्री रेवन्त रेड्डी पनि सहभागी भएको बताइएको छ ।