काठमाडौं – बलिउडका वरिष्ठ अभिनेता रजा मुरादले आफ्नो मृत्युको हल्ला फैलाएको सामाजिक सञ्जाल पोस्टविरुद्ध आधिकारिक प्रहरी उजुरी दर्ता गरेका छन्। उक्त पोस्टले उनलाई मात्र होइन, उनका परिवार र साथीलाई पनि तनावमा पारेको थियो।

सामाजिक सञ्जाल पोस्टमा अभिनेता मुरादको जन्ममिति र नक्कली मृत्यु मिति उल्लेख गर्दै उनलाई दिवंगत घोषित गरिएको थियो। यसले परिवार र साथीलाई बारम्बार सान्त्वना दिनुपर्ने अवस्था सिर्जना गरेको उनले बताएका छन्।

उक्त घटनाप्रति उनले आक्रोश व्यक्त गर्दै पोस्ट बनाउने व्यक्तिको मानसिकतालाई आलोचना गरेका छन्। अभिनेता मुरादका अनुसार प्रहरीले उनको उजुरी स्वीकार गरी शुक्रबार एफआईआर दर्ता गर्ने प्रक्रिया सुरु गरिसकेको छ। अभिनेताले यस्ता घटनालाई रोक्न उदाहरणीय कदम उठाउन आग्रह गरे।

भारतीय मिडिया अनुसार, मुम्बईको अम्बोली पुलिसले उक्त उजुरीको आधारमा धारा ३५३(१) (सार्वजनिक अशान्ति सिर्जना गर्ने वक्तव्य) र ३५६(२) (निन्दा) अन्तर्गत गैर-संज्ञेय अपराध दर्ता गरेको छ। यस घटनामा जैनब खान नामक व्यक्तिलाई मुख्य आरोपीको रूपमा नामित गरिएको छ। पुलिसले यस विषयमा थप अनुसन्धान अघि बढाइरहेको जनाएको छ।

रजा मुरादले सन् १९७० को दशकदेखि बलिउडमा अभिनय गर्दै पाँच दशकभन्दा बढी समयसम्म आफ्नो छवि निर्माण गरेका छन्। खलनायकदेखि चरित्र भूमिकासम्म उनले बहुआयामिक अभिनय प्रस्तुत गर्दै बलिउडमा आफ्नो छुट्टै पहिचान बनाएका छन्।

उनका चर्चित फिल्ममा प्रेम रोग, राम तेरी गंगा मैली, खुदगर्ज, त्रिदेव, मोहरा र पद्मावत समावेश छन्। दमदार आवाज र प्रभावशाली अभिनयले उनलाई बलिउडका सबैभन्दा चिनिने र सम्मानित कलाकारको रुपमा स्थापित गरेको छ।