काठमाडौं – भदौ ६ बाट प्रदर्शनमा आएका तीन फिल्म मध्ये ‘माग्ने राजा’ले दर्शकबाट उल्लेखनीय साथ पाएको छ ।

सुरुवाती दुई दिनको अनुपेन्सी हेर्दा अर्को फिल्म ‘जनै हराएको मान्छे’ भने अपेक्षित व्यापार गर्न सकेन । तथापि फिल्म हेरेका दर्शकले सकारात्मक प्रतिक्रिया दिएका छन् ।

अर्को फिल्म ‘ताराहरु’ व्यापार भने कमजोर छ । यसको असर शो बाँडफाँटमा देखिएको छ । यसको शो संख्या खुम्चिएर पाँचभन्दा कम पुगेको छ ।

केदार घिमिरे ‘माग्ने बूढा’ र नायिका वर्षा सिवाकोटी स्टारर फिल्म ‘माग्ने राजा’ले उच्च अकुपेन्सीका साथ ओपनिङ गरेको थियो । पहिलो दिन शुक्रबार नै केही हलहरु हाउसफूल भेटिए ।

शनिबार सार्वजनिक बिदाको उपभोग यो फिल्मले राम्रैसँग गरेको पाइएको छ । शनिबार धेरै हलहरु यो फिल्मले हाउसफूल गर्न सफल भयो ।

वितरक रोतिह कट्टेलका अनुसार यो फिल्मको व्यापार निर्माण पक्षले सोचेभन्दा पनि राम्रो भएको छ । उनी भन्छन्, ‘हिजो शनिबारको व्यापार त झन् नै राम्रो छ । यति धेरै हलहरु हाउसफूल भए ।’

दुई फिल्मसँग बक्स अफिस प्रतिस्पर्धा गरे पनि ‘माग्ने राजा’को सुरुवाती दुई दिनको व्यापार सहजै एक करोड नाघ्ने उनले बताए । भने, ‘मलाई पनि बक्स अफिस रिपोर्ट आइसेकेको छैन । तर, एक करोड व्यापार सहजै कट्छ ।’

आइतबार पनि मोफसलका केही हलहरु हाउसफूल देखिएका छन् । आइतबार व्यापार कम हुने दिन पनि अकुपेन्सी राम्रै देखिएको वितरक कट्टेलको दाबी छ ।

व्यापारिक रुपमा सबैभन्दा सफल भएर रेकर्ड राखेको ‘पूर्णबहादुरको सारङ्गी’पछि नायक विजय बराल शीर्ष भूमिकामा रहेको पहिलो फिल्म ‘जनै हराएको मान्छे’ हो ।

विजयको कारण पनि यो फिल्मको व्यापार आक्रमक हुनसक्ने विश्लेषण गरिएको थियो । तर, अकुपेन्सी र विश्लेषण फरक देखिएको छ । यो फिल्मले मध्यम व्यापार गरेको छ ।

शनिबार यो फिल्मले पनि केही हल हाउसफूल गराएको थियो । शनिबार यो फिल्मको अकुपेन्सी ४०–५० प्रतिशत रह्यो । आइतबार पनि मोफोसलका केही एक–दुई हलको बुकिङ हाउसफूल देखिन्छ । तथापि यो फिल्मले सकारात्मक ‘वर्ड अफ माउथ’ पाएको छ ।

यस फिल्ममा विजयसहित नायिकाहरु केकी अधिकारी र मिरुना मगर शीर्ष भूमिकामा रहेका छन् ।

तीन फिल्ममा ‘तारा’ भने निकै कमजोर सावित भएको छ । शुक्रबार र शनिबार अकुपेन्सी कमजोर हुँदा आइतबारबाट यसको शो नै घटेको छ । सोमबारका लागि यसले तीन शो मात्रै पाएको छ ।

यस फिल्ममा आशान्त शर्मा, नायिका मेनुका प्रधान र मिरा खड्का मुख्य भूमिकामा छन् ।