काठमाडौं – सामुदायिक विद्यालय सुधारको विषयमा छलफल भएको छ। शनिबार वालिङमा भएको विद्यालय शिक्षा सबलीकरण कार्यक्रममा हिमालयन ह्वाइट हाउस इन्टरनेशनल कलेज, काठमाडौंका प्रिन्सिपल तोयानारायण पौडेलले प्रस्तुति दिए।

कार्यक्रममा नगरपालिकाका प्रमुख, उपप्रमुख, वडाध्यक्ष, कार्यपालिकाका सदस्य, विद्यालयका प्रधानाध्यापक र व्यवस्थापन समितिका प्रतिनिधि सहभागी थिए। शिक्षाको गुणस्तरमा वृद्धि, विद्यार्थीको उपलब्धि अनुगमनका निम्ति नयाँ विधि, सिमान्तकृत समुदायका विद्यार्थीलाई अध्ययनमा सहयोग, शिक्षकको प्रस्तुतिमा सुधारका विषयमा पौडेलको प्रस्तुति थियो।

सिकाइको लागि विद्यालयको भौतिक वातावरणमा सुधार गर्नुपर्ने उनको भनाइ छ। विद्यालयका लागि बहुआयामिक सूचना तथा सञ्चार कक्षा, विज्ञान प्रयोगशाला तथा पुस्तकालय, विद्यार्थीमैत्री फर्निचर, उचित प्रकारको पर्खाल हुनुपर्ने पौडेलले प्रष्ट पारे। विद्यार्थीको सिकाइ विकासका लागि उमेरअनुसारको पाठ्यक्रम र खेल सामग्री हुनुपर्ने उनले बताए।

सिर्जनात्मक शिक्षण विधि, डिजिटल सामग्रीको प्रयोग र कक्षाकोठा व्यवस्थापनको दृष्टिकोणबाट शिक्षक लक्षित तालिम विस्तार गर्नुपर्ने, कृषि, प्रविधि र व्यावसायिक तथा व्यवहारिक शिक्षालाई प्राथमिकता दिनुपर्नेमा उनको जोड छ।

५० हजार भन्दा बढी जनसंख्या भएको वालिङमा नगरपालिकाको १४ वटा वडामा ७० वटा सामुदायिक विद्यालय छन्। पौडेलको प्रस्तुतिले सामुदायिक विद्यालयमा शिक्षा सुधारको लागि महत्त्वपूर्ण पहल भएको कार्यक्रममा सहभागी तथा सरोकारवालाले प्रतिक्रिया दिएका छन्।