काठमाडौं– पाकिस्तानको खैबर पख्तुनख्वा प्रान्तस्थित बजौर क्षेत्रमा सैन्य कारवाहीका कारण ५५ हजार जना विस्थापित भएका छन् । अधिकारीहरुले एक्कासी कर्फ्यू जारी गरेपछि सो क्षेत्रमा अरु ४ लाख जना घेराबन्दीमा परेका छन् ।

पाकिस्तानबाट प्रकाशित हुने डन अखबारका अनुसार खैबर पख्तुनख्वा प्रान्तका विधायक निसार बाजले सैनिक कारवाहीका कारण ५५ हजार जना घर छाडेर भाग्न बाध्य भएको जनाएका छन् ।

सुरक्षा बैठकमा बोल्दै उनले यसरी विस्थापित भएकाहरुलाई स्वास्थ्य, खाद्यान्न, खानेपानीजस्ता अत्यावश्यक सेवा र वस्तुको अभाव भइरहेको उल्लेख गरेका छन् ।

विस्थापितलाई सहयोग गर्न सरकारले कुनै कदम नचालेको उनको आरोप छ । उनले कर्फ्यू आदेश स्थगित गरी विस्थापितलाई घर फर्किने वातावरण बनाउन पनि आग्रह गरेका छन् ।

पाकिस्तानी सेनाले सो क्षेत्रमा आतंकवादीविरुद्ध सैन्य कारवाही सञ्चालन गरिरहेको छ । पाकिस्तानी सेनाले सञ्चालन गर्ने यस्ता कारवाहीमा प्रायः स्थानीयहरु पीडित हुँदै आएका छन् ।