काठमाडौं– बलिउड सुपरस्टार शाहरुख खानका छोरा आर्यन खानले आफ्नो पहिलो निर्देशन यात्रा सुरु गर्दै ‘द ब्याड्स अफ बलिउड’ को प्रिभ्यू सार्वजनिक गरेका छन् ।

महिनौँदेखि प्रतीक्षामा रहेका दर्शकले पहिलो झलक पाएलगत्तै, यो वेब सिरिजले बलिउडमा नयाँ तरंग ल्याएको छ । आगामी भाद्र ३० गते (१८ सेप्टेम्बर २०२५) बाट यो श्रृंखला नेटफ्लिक्समार्फत स्ट्रिम हुने निश्चित भएको छ ।

प्रिभ्यू लन्चमा सुपरस्टार शाहरुख खान आफैँ उपस्थित भए । स्टार कास्टलाई मिडियासामु प्रस्तुत गर्दै उनले छोराको यात्रा प्रति समर्थन जनाए । आर्यनले आफ्नी आमा गौरीलाई मिडियासामु परिचय गराउँदै आफू निर्देशक र निर्माता बन्नुको श्रेय उनीमाथि दिएको कुराले पनि धेरैलाई छोयो ।

यस वेब सिरिजलाई सामान्य डेब्यू भन्न सकिँदैन। प्रिभ्यूमा सलमान खान र करण जोहरको झलक देखिन्छ । बबी देओलको विशेष भूमिका, लक्ष्य र सहेर बम्बाको मुख्य अभिनय, राघव जुयाल, मोना सिंह, अन्या सिंह, गौतमी कपूर, मनोज पाहवा, विजयन्त कोहली र मनीष चौधरी जस्ता अनुभवी कलाकारको सहभागिताले यसलाई बलिउडको ठूलो पारिवारिक उत्सव झैँ बनाएको छ।

आर्यन खानले निर्देशन रोज्नु, केवल नयाँ पथमा हिँड्ने प्रयास मात्र होइन, आफ्नो ‘स्टार किड’ छायाबाट बाहिर निस्कन खोज्ने संकेत पनि हो । आजको डिजिटल युगमा नेटफ्लिक्स जस्तो प्लेटफर्मले विश्वव्यापी दर्शकलाई सीधा आकर्षित गर्ने शक्ति दिन्छ।
यदि ‘द ब्याड्स अफ बलिउड सफल हुन्छ भने, यसले बलिउडमा नयाँ पुस्ताका फिल्म–निर्मातालाई फरक कथाभन्दा फरक दृष्टिकोणका लागि प्रेरणा दिनेछ।