काठमाडौं– नेपाली कांग्रेस सर्लाहीका सभापति सुरेन्द्रप्रसाद सिंहले राजीनामा दिएका छन् । उनले सभापति शेरबहादुर देउवासमक्ष शुक्रबार राजीनामा पत्र बुझाएका हुन् । 

अदालतको निर्णय, प्रचलित कानुन र पार्टीको विधानबमोजिम सभापतिको रूपमा निरन्तर रहने अवस्था नरहेको सिंहले राजीनामा पत्रमा उल्लेख गरेका छन् । उनलाई अदालतले वन मुद्दामा भ्रष्टाचारी ठहर गरेको थियो । 

‘यसकारण म नियम, कानुन र पार्टीको बृहत्तर हितलाई मध्यनजर गर्दै नेपाली कांग्रेस जिल्ला कार्यसमिति सर्लाहीको पार्टी सभापति पदबाट राजीनामा दिएको जानकारी गराउँछु,’ उनले भनेका छन् । 

सिंहले अदालतको निर्णय मान्नु आफ्नो कर्तव्य भए पनि निर्णयले अन्याय भएको पनि जिकिर राजीनामा पत्रमा उल्लेख गरेका छन् । 
‘म माथि भएको अन्यायको म व्यक्तिगत रूपमा मेरो कानुनी तथा न्यायिक लडाइँ लडिरहने छु । साथमा मेरो राजनीतिक लडाइ जारी नै रहने छ,’ उनले भनेका छन् ।