काठमाडौँ – तराई–मधेशकेन्द्रित सात दलीय गठबन्धन ‘संघीय लोकतान्त्रिक मोर्चा’को बैठक बस्दैछ ।

मोर्चाको घटक जनता समाजवादी पार्टी (जसपा) नेपालका अध्यक्ष उपेन्द्र यादव मुछिएको गौर हत्याकाण्डबारे साझा धारणा तय गर्न बैठक बस्न लागेको हो ।

मोर्चाको अर्को घटक जनता प्रगतिशील पार्टी, नेपालका अध्यक्ष हृदयेश त्रिपाठीले गौर हत्याकाण्डबारे छलफल गर्न मोर्चाको बैठक बस्न लागेको जानकारी दिए ।

उनकाअनुसार बैठक बुधबार बेलुकी ५ बजे थापागाउँस्थित जनता प्रगतिशील पार्टीको कार्यालयमा बस्ने तय भएको छ ।

बैठकमा कात्तिक १७ गतेका लागि तय भएको रूपन्देही–३ को उपनिर्वाचनका तयारीबारे पनि छलफल हुने एजेन्डा रहेको अध्यक्ष त्रिपाठीले बताए ।

रूपन्देही–३ मा मोर्चा (जनमत पार्टीबाहेक) ले नागरिक उन्मुक्ति पार्टी (नाउपा) का तर्फबाट साझा उम्मेदवार अघि सार्ने निर्णय यसअघि नै गरिसकेको छ ।