काठमाडौं– चीनको सिन्जियाङ क्षेत्रमा उइग्युर समुदायका बधुवा मजदुरको श्रम प्रयोग गरेको विषयमा अष्ट्रेलियाको प्रमुख खुद्रा कम्पनी केमार्ट विवादमा मुछिएको छ । यसबारे अष्ट्रेलियामा आधारित उइग्युर अधिकारवादी समूहले संघीय अदालतमा मुद्दा दायर गरेको छ ।

केमार्टमाथि लगाइएको मुद्दामा उइग्युर समुदायका बधुवा मजदुरको श्रम प्रयोग गरी कपडाजन्य वस्तु आपूर्ति गरेको आशय छ । अष्ट्रेलियन उइग्युर टङ्ग्रीटाग वुमन्स एशोसिएशनले दायर गरेको मुद्दामा केमार्टले सन् २०२३ र २०२५ मा सिन्जियाङका दुई आपूर्तिकर्तासँग व्यापार गरेको हुनसक्ने जनाइएको छ ।

केमार्टले यसबारे आफ्नो ग्राहकलाई प्रष्ट सूचना नदिएर गुमराहमा पारेको पनि एशोसिएशनको दाबी छ । केमार्टले बधुवा मजदुरको प्रयोग गरेर मुनाफा नकमाएको भनी प्रष्ट पार्न सक्नुपर्ने एशोसिएशनकी प्रमुख रमिला चानिशेफले जनाएकी छिन् ।

केमार्टले भने यस आरोपको खण्डन गरेको छ । यद्यपि आरोप प्रमाणित भएमा केमार्टले अष्ट्रेलियाको उपभोक्ता कानुनको उल्लङ्घन गरेको ठहरिने अष्ट्रेलियन एशोसिएटेड प्रेसले जनाएको छ ।