काठमाडौं– गत चैत १५ पत्रकार सुरेश रजक र यातायात मजदुर सविन महर्जनको ज्यान जाने गरी काठमाडौंको तीनकुनेमा भएको राजावादीको हिंस्रक प्रदर्शनपछि जेल पुगेका दुर्गा प्रसाईं पहिलो पटक पत्रकारमाझ सार्वजनिक भएका छन् ।

गत साउन १९ गते डिल्ली बजार कारागारबाट रिहा भएदेखि मौन बस्दै आएका प्रसाईंले सोमबार भक्तपुरस्थित निवासमै पत्रकार सम्मेलन गर्दै अन्य राजावादी दल र समूहलाई सकेसम्म गाली गरेका छन् ।

उनले राष्ट्रिय प्रजातन्त्र पार्टीका अध्यक्ष राजेन्द्र लिङ्देनले चैत १५ गते तीनकुनेमा भएको आन्दोलनमा धोका दिएको पनि आरोप लगाए ।

चैत २६ गते पक्राउ परेका उनी काठमाडौं जिल्ला अदालतको आदेशमा गत जेठ ३० गते डिल्ली बजार कारागारमा चलान भएका थिए।

करिब २ महिना हिरास त र दुई महिना जेल जीवन बिताएर रिहा भएका उनले लिङ्देनसहितका राजावादीलाई सक्दो गालीका शब्द बर्साए । उनले लिङ्देनले धोका दिँदा चैत १५ को आन्दोलन तुहिएको पनि बताए ।

प्रसाईंले लिङ्देनलाई भारतबाट गाडी चोर्दै नेपालमा ल्याएर पार्ट पुर्जा बेचेको आरोप लगाए । ‘चैत १५ को आन्दोलनमा राप्रपाबाट धोका दिए’, उनले लिङ्देनलाई लक्षित गर्दै भने, ‘तिमी जस्तो भारतबाट गाडी चोरेर ल्याउँदै बिर्तामोडमा काटेर बेच्ने मान्छे होइन म ।’