काठमाडौं- भारत र फिलिपिन्सले आफ्नो द्विपक्षीय सम्बन्धलाई रणनीतिक साझेदारीको स्तरमा विस्तार गरेका छन् । फिलिपिनी राष्ट्रपति फर्डिनान्ड मार्कोस जुनियरको भारत भ्रमणका क्रममा यस्तो घोषणा भएको हो ।

भारतको समाचार संस्था द प्रिन्टका अनुसार यो कदमपछि दुई देशबीच रक्षा, व्यापार र समुद्री सहयोग थप सुदृढ हुने अपेक्षा गरिएको छ । पछिल्लो समय दुई मुलुकबीच रक्षा, व्यापार, सूचना प्रविधि, नवीकरणीय ऊर्जाजस्ता क्षेत्रमा सहकार्य बढिरहेको अवस्थामा यो घोषणा भएको हो ।

पछिल्लो समय चीनले दक्षिण चीन सागरमा चीनले आफ्नो प्रभाव विस्तार गरिरहेको अवस्थामा भारत र फिलिपिन्सले रणनीतिक साझेदारीको घोषणा गरेका हुन् । यस कदमहरूले भारतको ‘एक्ट इस्ट’ नीतिलाई थप सुदृढ बनाउने विश्लेषकहरु बताउँछन् । यसबाट दक्षिणपूर्वी एसियामा भारतको उपस्थिती थप मजबुत हुने अपेक्षा गरिएको छ ।