काठमाडौं– स्पेनिस ला लिग फुटबलमा इस्पान्योलले सुखद सुरुवात गरेको छ । नयाँ सिजनको पहिलो खेलमा सोमबार बिहान एट्लेटिको मड्रिडलाई २–१ गोलले हराउँदै इस्पान्योलले जित निकालेको हो ।

इस्पान्योलका लागि मिगेल रुबियो र पेरे मिल्लाले एक–एक गोल गरेका थिए । एट्लेटिकोका जुलियन अल्भारेजले गोल गरे ।

खेलको ३७औँ मिनेटमा एट्लेटिकोका अल्भारेजले फ्रि किकमार्फत गोल गर्दै टोलीलाई सुरुवाती अग्रता दिलाएका थिए । ७३औँ मिनेटमा इस्पान्योलका रुबियोले गोल गर्दै खेललाई १–१ गोलको बराबरीमा ल्याए ।

त्यसपछि ८४औँ मिनेटमा मिल्लाले गरेको गोलसँगै इस्पान्योल २–१ गोलले विजयी भयो । सुरुको अग्रता जोगान नसक्दा एट्लेटिको मड्रिड भने नयाँ सिजनको पहिलो खेलमा स्तब्ध बन्न पुग्यो ।

यो जितसँगै इस्पान्योलले पहिलो खेलबाट तीन अंक जोडेको छ ।