काठमाडौं– चिकित्सा शिक्षा सुधार अभियन्ता डा. गोविन्द केसीले निजी मेडिकल तथा डेन्टल कलेजमा सिट वृद्धि गर्ने सरकारको निर्णयप्रति आपत्ति जनाउँदै तत्काल फिर्ता लिन माग गरेका छन् । 

शनिबार एक विज्ञप्ति जारी गर्दै डा. केसीले हालैको सिट बढाउने ‘गैर जिम्मेवार’सहित केही समययताका गलत निर्णय तथा फैसलाले चिकित्सा शिक्षा ऐनको अस्तित्व नै धरापमा परेको बताएका छन् । 

‘सिट बढाउने गैर जिम्मेवारपूर्ण निर्णय तुरुन्त फिर्ता लिन, शुल्क बढाउने कदम खारेज गर्न र आवासीय चिकित्सकहरूको निर्वाह भत्ता नेपाल सरकारका सरह गर्न, साथै विगतमा हामीले राखेका माग शीघ्र पूरा गर्न र हामीसित भएका सम्झौताहरू कार्यान्वयन गर्न जोडदार माग गरिन्छ,’ विज्ञप्तिमा उल्लेख छ ।

माग पूरा गर्न सरकारलाई उनले ‘केही समय’ दिएका छन् । माग पूरा नगरिए सत्याग्रहसहितको आन्दोलन थाल्ने उनले चेतावनी दिएका छन् ।