काठमाडौं- ‘तोदा’ उपन्यास र ‘सयौं पुतली’ कथा सङ्ग्रह लगायत आधा दर्जन पुस्तककी लेखक उमा सुवेदीद्वारा लिखित उपन्यास ‘परिधि’ बजारमा अएको छ ।
काठमाडौंमा शनिबार एक समारोहका बीच लेखक कुमारी लामा, केशव दाहाल र कलाकार गौरी मल्लले संयुक्त रुपमा परिधिको लोकार्पण गरेका हुन् । सुवेदीको यो तेस्रो आख्यान साङ्ग्रिला बुक्सले प्रकाशन गरेको हो ।
कार्यक्रममा बोल्दै लेखक कुमारी लामाले ‘परिधि’मा स्वैर कल्पनाको प्रचुरतासँगै यथार्थताको धरातललाई पनि सँगै लिएर गएको बताइन् ।
लेखक केशव दाहालले ‘परिधि’ संरचनाका हिसाबले नयाँ तर बेजोड कृति भएको बताए । उनले यस आख्यानमा बिम्बको प्रयोग सुन्दर तरिकाले गरिएको बताउँदै लेखकको निखारिएको शिल्पले पाठकलाई शुरुदेखि अन्त्यसम्मै बाँधेर राख्ने दाबी गरे ।
कलाकार गौरी मल्लले ‘परिधि’ नविन र शसक्त शैलीको नेपाली आख्यान भएको बताइन् । यस आख्यानका पात्रले आफूभित्र उचित-अनुचित, असल-खराब, ठीक-बेठिक जस्ता कुराहरु बारेमा पुनः सोच्न बाध्य बनाएको बताइन् ।
लेखक उमा सुवेदीले आफूले भन्न चाहेको कथाका लागि विशिष्ट शैली आवश्यक भएकाले आफूले कथा भन्ने शैलीमा प्रयोग गरेको बताइन् ।
उमा सुवेदीका यसअघि तप्किएर अञ्जुलीमा (गजलसङ्ग्रह), तिर्सनाका छालहरु (गीतसङ्ग्रह), तोदा (उपन्यास), इति (उपन्यास) र सयौं पुतली (कथासङ्ग्रह) प्रकाशित छन्।
प्रतिक्रिया