मुम्बई – समाजवादी पार्टीकी सांसद तथा बलिउड नायिका जया बच्चन मंगलबार दिल्लीस्थित संविधान क्लबमा सार्वजनिक रूपमा रिसाएर एक व्यक्तिलाई धकेलेको भिडियो सामाजिक सञ्जालमा भाइरल भएको छ। यो घटना त्यति बेला सुरु भयो जब एक व्यक्ति नायिका जयासँग सेल्फी खिच्न प्रयासरत थिए। भिडियोमा स्पष्ट देखिन्छ, जया बच्चनले उक्त व्यक्तिलाई धकेल्दै रिसपूर्ण स्वरमा सोधिन्, “के गर्दै हुनुहुन्छ तपाईं? यो के हो?”

यस घटनामा अभिनेत्री र मण्डीबाट बीजेपी सांसद कंगना रनौतले पनि प्रतिक्रिया दिइन्। उनले आफ्नो इन्स्टाग्राम स्टोरीमा उक्त भिडियोलाई शेयर गर्दै लेखिन्, “सबैभन्दा बिग्रेको र सुविधा सम्पन्न महिला। मानिसले उनको रिस/असमझदारी सहन्छन् किनभने उनी अमिताभ बच्चन जीकी श्रीमती हुन्।”

नायिका कंगनाले जया बच्चनको बारेमा बोलेको यो पहिलो पटक भने होइन। यी दुवै नायिका बीच टिका टिपणीको वार पहिला देखिने हुँदै आएको हो। कलाकारले मात्रै हैन धेरै दर्शकले पनि जया बच्चनको यस्तो व्यवहारबाट निराश भएका छन् र सामाजिक सञ्जालमा आफ्नो असन्तोष व्यक्त गरेका छन्। एक प्रयोगकर्ताले लेखे, “यो त उनको दोहोरिएको व्यवहार हो, यस्तो व्यक्तिसँग सेल्फी खिच्न मान्छे किन पागल हुन्छन्?” अर्काले टिप्पणी गरे, “साँचिकै असभ्य व्यवहार!” तेस्रोले लेखे, “उनी सधैं केही न केही कारणले रिसाउँछिन् जस्तो लाग्छ, तर हामी उनलाई अभिनेता भएर सम्मान गर्छौं।”

यो घटनापछि सामाजिक सञ्जालमा विवाद र प्रतिक्रिया दुवै देखा परेको छ। जया बच्चनको व्यवहार र कंगनाको प्रतिक्रियाले राजनीतिक तथा मनोरञ्जन जगतमा व्यापक चर्चा बढाएको छ।