काठमाडौं- बेलायती विश्वविद्यालयहरूमा चीनको बढ्दो प्रभावले शैक्षिक स्वतन्त्रतामाथि गम्भीर खतरा उत्पन्न भएको एक नयाँ प्रतिवेदनले खुलासा गरेको छ ।

बेइजिङले बेलायती उच्च शिक्षण संस्थाहरूमा आफ्नो प्रभाव विस्तार गर्दै वैचारिक स्वतन्त्रता र स्वतन्त्र अनुसन्धानमाथि नियन्त्रण गर्ने प्रयास गरिरहेको समाचारमा जनाइएको छ ।

भारतीय समाचार संस्था एएनआईका अनुसार संयुक्त अधिराज्य–चीन पारदर्शीता (यूकेसीटी) नामक संस्थाले यसबारे अध्ययन गरी प्रतिवेदन सार्वजनिक गरेको हो । चीनले कोष, साझेदारी, र कन्फ्युसियस इन्स्टिच्युटजस्ता संरचनाहरू मार्फत बेलायती विश्वविद्यालयहरूमा प्रभाव विस्तार गरेको प्रतिवेदनमा उल्लेख गरिएको छ ।

यी संस्थाहरूले चिनियाँ कम्युनिष्ट पार्टीको विचारधारा अनुरूप विषयवस्तुहरूलाई प्रोत्साहन गर्ने र तिब्बत, ताइवान, र हङकङको स्वतन्त्रताजस्ता विषयमाथिको छलफललाई दबाउने गरेको प्रतिवेदनमा आरोप लगाइएको छ ।

प्रतिवेदनले केही विश्वविद्यालयहरूले चिनियाँ सरकारको आर्थिक सहयोग स्वीकार गरेपछि स्वतन्त्र अनुसन्धान र अभिव्यक्ति स्वतन्त्रतामा सम्झौता गरेको दाबी गरेको छ । साथै, चिनियाँ विद्यार्थीहरू र प्राध्यापकहरूमाथि निगरानी र दबाबको घटनाहरू पनि बढ्दै गएको उल्लेख छ ।

यो मुद्दाले बेलायतमा मात्र नभई विश्वभरका शैक्षिक संस्थाहरूमा विदेशी प्रभावको खतरा र स्वतन्त्रताको संरक्षणबारे बहसलाई तीव्र बनाएको छ।