काठमाडौं– रमपम चाउचाउ उत्पादन गर्ने एसियन थाई फुड्स लिमिटेडले सर्वसाधारणको लागि साधारण शेयर (आईपीओ) निष्कासन गर्ने भएको छ । नुडल्स र स्न्याक्सको उत्पादक तथा निर्यातकर्ता एसियन थाई फुड्सले गर्दै आएको छ । 

आईपीओ निष्कासनका लागि बिक्री प्रबन्धकमा हिमालयन सेक्युरिटिज बैंकर लिमिटेडलाई नियुक्त गरेको छ । 

उक्त सम्झौतामा एसियन थाई फुड्स लिमिटेडका अध्यक्ष शिवरतन शारडा र हिमालयन सेक्युरिटिज बैंकर लिमिटेडका प्रमुख कार्यकारी अधिकृत सुभास बहादुर श्रेष्ठले हस्ताक्षर गरेका छन् । 

कार्यक्रममा एसियन थाई फुड्सका प्रबन्ध निर्देशक महेश जाजु, कार्यकारी निर्देशक राधेश्याम शारडा र निर्देशक आशिष जाजु तथा हिमालयन सेक्युरिटीजका नायब महाप्रबन्धक शंकर राजवाहकको उपस्थिति थियो । 

विराटनगर र तौलिहवामा अत्याधुनिक उत्पादन एकाइहरू सहित कम्पनीले आफ्ना उच्च गुणस्तरका उत्पादनहरू ३० भन्दा बढी देशहरूमा निर्यात गर्दछ । 

कम्पनीका लोकप्रिय ब्रान्डहरू जस्तै रमपम, टुपीएम र प्रीतिले बजारमा बलियो पहिचान बनाएका छन् ।