काठमाडौं– अखिल नेपाल फुटबल संघ (एन्फा)ले ग्रासरुट्स फुटबल कार्यक्रमको शुभारम्भ गरेको छ ।  

बाल फुटबलको विकास र बालबालिकाको संरक्षण सुनिश्चित गर्ने उद्देश्यका साथ एन्फाले ग्रासरुट्स फुटबल कार्यक्रमको शुभारम्भ गरेको हो । 

मंगलबार सातदोबाटो स्थित एन्फा कम्प्लेक्समा आयोजित कार्यक्रममा एन्फाले ग्रासरुट्स फुटबल कार्यक्रमको लागो सार्वजनिक गरेको थियो ।

कार्यक्रममा एन्फा अध्यक्ष पंकज विक्रम नेम्वाङले देशभरका युवा प्रतिभाहरूलाई पहिचान र अभिवृद्धि गर्ने लक्ष्यका साथ ग्रासरुट्स फुटबल कार्यक्रम सञ्चालन गरिएको जानकारी दिए ।

फुटबलको आधारभूत स्तम्भ ग्रासरुट्स रहेकाले ग्रासरुट्समा प्रभावकारी ढंगले काम गर्न सके समग्र फुटबलको विकासमा ठूलो टेवा पुग्न सक्ने उनको भनाइ छ ।

अध्यक्ष नेम्वाङले फिफाबाट पारित भएको ग्रासरुट्स फुटबल कार्यक्रम देशका विभिन्न ४९ जिल्लामा सञ्चालन हुने जानकारी दिए । 

ग्रासरुट्स फुटबल कार्यक्रम सञ्चालनका लागि एन्फाले टिडिएच र चाइल्ड नेपालसँग सम्झौता समेत गरेको छ ।