काठमाडौं- हङकङ प्रशासनले राष्ट्रिय सुरक्षा उल्लङ्घन गरेको आरोपमा १६ जनालाई लक्षित गर्दै नयाँ प्रतिबन्धात्मक कदमहरु चालेको छ । हङकङ प्रशासनले उनीहरुसँग पैसाको कारोबार गर्न प्रतिबन्ध लगाएको छ । त्यसैगरी, उनीहरुमध्ये १२ जनाको राहदानी पनि रद्द गरिएको छ ।

सुरक्षा मन्त्री क्रिस ट्याङ पिङ–केउङले ‘राष्ट्रिय सुरक्षा संरक्षण अध्यादेश’ अन्तर्गत यी कदमको घोषणा गरेका हुन् । साउथ चाइना मर्निङ पोस्टका अनुसार उनीहरु ‘हङकङ पार्लियामेन्ट’ नामक समूहमा आबद्ध छन् ।

उनीहरु सबै जना विदेशमा बसोबास गर्दै आएका छन् । हङकङ प्रशासनका एक जना प्रवक्ताले पोस्टलाई बताएअनुसार उनीहरु ‘अमेरिका, क्यानडा, जर्मनी, अष्ट्रेलिया, थाइल्याण्ड, चीनको ताइवान क्षेत्रजस्ता ठाउँमा लुकेर राष्ट्रिय सुरक्षालाई खतरामा पार्ने गतिविधिहरूमा संलग्न छन् ।’

उनीहरुमाथि सन् २०२० मा लागू गरिएको राष्ट्रिय सुरक्षा कानून उल्लङ्घन गरेको आरोप पनि लागेको छ ।