काठमाडौं– यस वर्षको शुरुयता पाकिस्तानमा पोलियो रोगका १९ औँ बिरामी फेला परेका छन् । पाकिस्तानको पोलियो उन्मूलन कार्यक्रमअन्तर्गत क्षेत्रीय रेफरेन्स प्रयोगशालाले खैबर पख्तुनख्वाका एक जना बिरामीमा पोलियो देखिएको जानकारी दिएको हो ।

खैबर पख्तुनख्वाको लक्की मरवत क्षेत्रमा बसोबास गर्ने ५ वर्षीय बालकमा पोलियो देखा परेको पाकिस्तानी सञ्चार माध्यमले जनाएका छन् । पाकिस्तानबाट प्रकाशित हुने डन अखबारका अनुसार हालसम्म खैबर पख्तुनख्वामा १२ जनामा पोलियो देखिएको छ ।

पोलियो रोग लागेका बालबालिकामा पक्षाघात हुने गर्छ ।

पोलियोको कुनै उपचार नभएकाले केवल रोकथाम मात्र सम्भव छ । पोलियो उन्मूलनका लागि पाकिस्तान सरकारले बारम्बार खोप अभियान सञ्चालन गर्दै आएको छ ।

यद्यपि पाकिस्तानका कतिपय समुदायले आफ्ना बालबालिकालाई पोलियो खाप दिन अस्वीकार गर्दै आएका छन् । पाकिस्तानमा पोलियो खोप अभियानमा संलग्न सुरक्षाकर्मी एवम् स्वास्थ्यकर्मीलाई लक्षित गरी आक्रमणका घटना पनि हुने गरेका छन् ।