काठमाडौं- पाकिस्तानले अफगानिस्तानको खोस्त प्रान्तसँग जोडिएको गुलाम खान सीमा नाका बन्द गरेको छ । यससँगै दुई मुलुकबीच व्यापार तथा सीमापार सम्बन्धमा गम्भीर असर पर्ने चिन्ता बढेर गएको छ ।

खामा प्रेसका अनुसार पाकिस्तान सरकारको यो कदमले स्थानीय व्यापारीहरू र सीमावर्ती समुदाय प्रभावित भएका छन् । यो नाकालाई दुई देशबीच व्यापार र आवागमनको लागि महत्वपूर्ण मानिन्छ ।

यसअघि ‘टोकन’ प्रणालीमार्फत् बिरामीहरू जस्ता निश्चित व्यक्तिहरूलाई पूर्ण यात्रा दस्तावेज बिना सीमा पार गर्न अनुमति दिँदै आएको थियो । यद्यपि अहिले भने त्यो पनि बन्द भएको जनाइएको छ ।

सीमा बन्दले विशेषगरी सामान ढुवानीमा बाधा पुगेको छ । व्यापारीहरूले यो कदमले आपूर्ति शृंखलामा अवरोध र मूल्यवृद्धि निम्त्याउन सक्ने चेतावनी दिएका छन् । साथै, स्थानीय बासिन्दाहरूले आफ्ना आफन्तहरूसँगको सम्पर्क र आधारभूत वस्तुहरूको पहुँचमा कठिनाइ भएको गुनासो गरेका छन् ।

पाकिस्तान सरकारले सुरक्षा चिन्ता र सीमा नियन्त्रणमा कडाइ गर्न यस कदम चालेको जनाएको छ । यद्यपि विश्लेषकहरु भने यो निर्णयले दुई छिमेकी देशबीचको सम्बन्धमा तनाव बढाउन सक्ने बताएका छन् ।