नवलपुर- नवलपुरको गैंडाकोटमा आज (आइतबार) ट्रक र स्कुटर ठोक्किँदा दुई जनाको मृत्यु भएको छ ।

गैंडाकोटको खरकट्टा जंगलमा ना ५ ख ८४१७ नम्बरको सामान लोड गरेको ट्रक र लु ५५ प ३१३४ नम्बरको स्कुटर आपसमा ठोक्किँदा दुई जनाको मृत्यु भएको जिल्ला प्रहरी कार्यालयले जनाएको छ ।

मृतकहरूको सनाखत भइसकेको छैन । ट्रकमुनि दुई जना च्यापिएको अवस्थामा रहेकाले उद्धार प्रयास भइरहेको प्रहरीले जनाएको छ ।

गैंडाकोटबाट कावासोतीतर्फ आउँदै गरेको ना ५ ख ८४१७ नम्बरको ट्रकले विपरित दिशाबाट जाँदै गरेको लु ५५ प ३१३४ नम्बरको स्कुटरलाई ठक्कर दिएको हो ।

जिल्ला प्रहरी कार्यालय नवलपुरका प्रहरी उपरीक्षक यादव ढकालका अनुसार ट्रकमा दुईजना च्यापिएर रहेकोले क्रेनको सहायताले ट्रक हटाउने प्रयास भइरहेको छ ।

ट्रकमा च्यापिएकाको पहिचान भएको छैन । दुर्घटनाको कारण र विस्तृत विवरण आउन बाँकी छ ।