काठमाडौं– कार्गो ढुवानी (कुरियर) व्यवसाय सञ्चालन गर्दै आएको एजी एक्सप्रेसको तीनकुनेस्थित कार्यालयमा चोरी भएको छ । 
बुधबार राति १ बजे कार्यालयको ताला फोडेर चोर भित्र प्रवेश गरेको सीसी टीभी फुटेजमा देख्न सकिन्छ । 

चोरले कार्यालयबाट २५ हजार रुपैयाँ नगद र डेलको महँगो ल्यापटप चोरेर लगेको एजी एक्सप्रेसका सञ्चालक तुलसी उप्रेतीले खबरहबलाई बताए । 

उप्रेतीका अनुसार चोरले राति १ बजे प्यासेजमाथि उक्लेर ढोकाको चाबी फोडेको र खाली खुट्टा कार्यालयभित्र प्रवेश गरेको देखिन्छ । 

विगत १० वर्षदेखि हङकङ लगायत विश्वका विभिन्न ठाउँमा कार्गो ढुवानी सेवा सञ्चालन गर्दै आएको कम्पनीको कार्यालय तीनकुनेस्थित प्रहरी कार्यालयबाट करिब दुई सय मिटर टाढा रहेको छ । कार्यालय अगाडि सडक बत्तीको उज्यालो रातभर रहने गरेको छ ।

साथै, कार्यालयमा १० वटा सीसी टीभीहरु रहेको र चोरको अनुहार फुटेजमा प्रष्टसँग देखिएको उप्रेती बताउँछन् । भिडियो फुटेजका आधारमा चोरको खोजी कार्य जारी रहेको प्रहरीले जनाएको छ ।

भिडियोमा हेर्नुहोस् :