किभ- युक्रेनी राष्ट्रपति भोलोदिमिर जेलेन्स्कीले कुनै हालतमा युक्रेनलाई दोस्रो पटक विभाजन गर्न नदिने बताएका छन् ।

सामाजिक सञ्जाल एक्समा भिडियो पोस्ट गर्दै उनले रूसलाई जमिन दिएर नभई न्यायपूर्ण र निष्पक्ष युद्ध अन्त्य गरेर मात्रै शान्ति आउन सक्ने पनि बताएका छन् ।

‘हामी विभाजनको यो दोस्रो प्रयासलाई विफल पार्नेछौँ । हामी रूसलाई जान्दछौँ, जहाँ दोस्रो विभाजन हुन्छ, त्यहाँ तेस्रो पनि हुन्छ’, उनले भनेका छन्, ‘त्यसैले हामी आफ्नो अडानमा अडिग छौँ । युद्ध शान्ति र बलियो सुरक्षा ढाँचाको साथ समाप्त हुनुपर्छ।’

अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिन अगस्ट १५ मा अलास्कामा भेट्न लागेका छन् । उनीहरूबीच जारी युद्ध अन्त्य गर्ने विषयमा छलफल हुने भएको छ ।

ट्रम्पले यसअघि युद्ध अन्त्य गर्न केही क्षेत्र साटासाट गर्नुपर्ने बताएका थिए। ट्रम्पको उक्त सर्तलाई जेलेन्सकीले अस्वीकार गरिदिएका हुन् ।

ट्रम्प यसपछि युक्रेनी राष्ट्रपति भ्लादिमार जेलेन्स्कीसँग पनि त्रिपक्षीय वार्ता गर्न चाहन्छन्। उनीहरू यस वार्तामा पुटिनलाई पनि समावेश गर्न चाहन्छन् ।

अमेरिका र रुसका राष्ट्रपतिबीचको अन्तिम भेट सन् २०२१ जुनमा भएको थियो । त्यसबेला तत्कालीन अमेरिकी राष्ट्रपति जो बाइडेन र पुटिनबीच जेनेभामा कुरा भएको थियो ।

चार वर्षपछि हुन लागेको यो बैठकका सम्बन्धमा ह्वाइट हाउसकी प्रेस सेक्रेटरी क्यारोलिन लेभिटले बुधबार पुष्टि गरेकी थिइन् । ‘रुसले ट्रम्पलाई भेट्ने इच्छा व्यक्त गरेको छ । ट्रम्प पुटिन र जेलेन्स्की दुवैसँग भेट्न तयार छन्’, उनले भनेकी थिइन् ।