काठमाडौं- पाकिस्तानको खैबर पख्तुनख्वा प्रान्तमा अशान्ति असुरक्षा बढेको भन्दै स्थानीयहरु चिन्तित बनेका छन् । पाकिस्तानी सेनाले सञ्चालन गरेको सैन्य कारबाहीले अशान्ति बढाएको उनीहरुको भनाइ छ ।

कश्मीर ब्रेकिङ न्यूजका अनुसार आतंकवादी गतिविधि नियन्त्रण गर्न भन्दै सरकारले हाल सो क्षेत्रमा सैन्य अभियानले सञ्चालन गरिरहेको छ । प्रान्तको बान्नु र उत्तर वजिरिस्तानजस्ता क्षेत्रमा सैन्य कारबाही तीव्र भएसँगै हजारौँ स्थानीय बासिन्दा विस्थापित भएका छन् । त्यसैगरी, कारवाही चर्किएसँगै नागरिक र सुरक्षाकर्मीबीचको सम्बन्ध पनि खराब बन्न थालेको छ ।

स्थानीयहरूले सैन्य कारबाहीका कारण आफ्नो दैनिक जीवन, व्यवसाय र सुरक्षामा गम्भीर असर परेको गुनासो गरेका छन् । सैन्य अभियानका क्रममा बम विस्फोट र गोलीबारीका घटनाले नागरिकको ज्यान जोखिममा परेको छ ।

मानवअधिकार संगठनहरूले सैन्य कारबाहीमा नागरिकको सुरक्षालाई प्राथमिकता दिन सरकारसँग माग गरेका छन् । प्रान्तीय सरकारले शान्ति कायम गर्न वार्ता र समन्वयको प्रयास गरिरहेको दाबी गरेको छ । तर स्थानीय बासिन्दाले सरकारको प्रतिबद्धताप्रति शंका व्यक्त गरेका छन् ।

सैन्य कारबाहीले आतंकवादी समूहलाई कमजोर बनाए पनि नागरिक जीवनमा परेको असरले दीर्घकालीन सामाजिक र आर्थिक संकट निम्त्याउन सक्ने चिन्ता व्यक्त गरिएको छ । स्थिति नियन्त्रणमा ल्याउन सरकारमाथि दबाब बढ्दो छ ।