काठमाडौं– अमेरिकको संघीय जाँचबुझ ब्यूरो एफबीआईका निर्देशक काश पटेलले न्यूजिल्याण्डमा नयाँ कार्यालयको उद्घाटन गरेका छन् । पटेलले चीनको प्रभावलाई रोक्ने उद्देश्यसहित दक्षिण प्रशान्त महासागरमा अवस्थित मुलुक न्यूजिल्याण्डमा कार्यालय स्थापना गरिएको जनाएका छन् ।

न्यूजिल्याण्डको राजधानी वेलिङ्टनमा एफबीआईले आफ्नो पहिलो कार्यालय स्थापना गरेको हो । पटेलले चीनको प्रभाव राक्न कार्यालय खोलिएको बताएपछि चीनले क्रुद्ध प्रतिक्रिया दिएको छ ।

चीनको विदेश मन्त्रालयका प्रवक्ता गुओ जियाकुनले पटेलको भनाइको निन्दा गरेका हुन् । तेस्रो मुलुकलाई लक्षित गरी मुलुकहरुबीच सहकार्य हुन नहुने चीनको विश्वास रहेको उनको भनाइ छ ।

किवी अधिकारीहरुले पनि पटेलको बयानप्रति रोष प्रकट गरेका छन् । किवी सरकारले जारी गरेको विज्ञप्तिमा अनलाइन बाल शोषण र लागूऔषध तस्करीजस्ता अपराधविरुद्ध अमेरिकासँग संयुक्त प्रयासस्वरुप कार्यालय स्थापना गरिएको उल्लेख छ ।

विज्ञप्तिमा चीनको नाम कतै उल्लेख गरिएको छैन । किवी विदेशमन्त्री विन्स्टन पिटर्सले पनि चीनको प्रभाव रोक्नेबारे अमेरिकासँग कुनै कुरा नभएको प्रष्ट्याएका छन् ।