इजरायल – इजरायली प्रधानमन्त्री बेन्जामिन नेतान्याहुले गाजा नियन्त्रण गर्ने प्रस्ताव गरेपछि हमासले गम्भीर चेतावनी दिएको छ। नेतान्याहुले फक्स न्युजसँगको अन्तरवार्तामा आफ्नो धारणा राखेपछि हमासले प्रतिक्रिया दिँदै बाँकी रहेका बन्दीको बारे नेतान्याहुले नसोचेको चेतावनी दिएको हो।

संयुक्त राष्ट्र संघले पनि इजरायली योजना अघि बढाइनु अहिले रहेका बन्दीहरूका लागि जोखिम हुने ठहर गरेको छ। यसैगरी इजरायलका लागि बेलायती राजदूतले यो ठुलो भुल हुने बताएका छन्।

इजरायलका लागि अमेरिकी राजदूत माइक हुकाबेले सिबिसीसँगको अन्तरवार्तामा प्यालेस्टाइनीलाई त्यहाँबाट हटाउन नहुने धारणा व्यक्त गरेका छन्।

इजरायली सञ्चार माध्यमले नेतान्याहुले गाजा खाली गर्ने योजना बुनेको तथा हमासलाई सखापै पार्नुको विकल्प नदेखेको समेत बताए।

हमासले भने बिहीबार नै विज्ञप्ति जारी गर्दै नेतान्याहुले नरसंहारलाई निरन्तरता दिन चाहेको बताए। अहिले नै इजरायली सेनाले गाजामा तीन चौथाइ कब्जा गरिसकेका छन्।