काठमाडौं- सरकारले वाचा गरेअनुसारका माग सम्बोधन गरेर विद्यालय शिक्षा विधेयक नल्याएपछि नेपाल शिक्षक महासंघले भदौ दोश्रो हप्तादेखि अर्को आन्दोलन गर्ने भएको छ।

बिहीबार काठमाडौंमा बसेको महासंघको बैठकले पूर्वसहमतिअनुसार शिक्षा विधेयक अघि नबढेको भन्दै भदौ दोस्रो सातादेखि अर्को आन्दोलन गर्ने निर्णय गरेको अध्यक्ष लक्ष्मीकिशोर सुवेदीले जानकारी दिए ।

आन्दोलनका कार्यक्रमका लागि आन्दोलन परिचालन समितिले खाका तयार गर्ने र राष्ट्रिय समितिले पारित गर्ने उनले जानकारी दिए ।

त्यसअघि भदौ ३ र ४ गतेका लागि राष्ट्रिय समितिको पूर्ण प्रत्यक्ष बैठक बोलाएको अध्यक्ष सुवेदीले बताए । उनले शिक्षा समितिमा विधेयकमाथि के भइरहेको भन्ने आफूलाई जानकारी नभएको उल्लेख गर्दै प्रतिनिधिसभामा विधेयक दर्ता भएपछि मात्रै आफूहरूका माग सम्बोधन गरेका बिषयको आँकलन गरिने जिकिर गरे ।

बैठकमा सरकारसँग भएको सहमतिपछि अहिलेसम्मको अवस्थाबारे समीक्षा गरिएको उनले बताए । समग्र शिक्षक कर्मचारीलाई सन्तुष्ट बनाउने गरि र विद्यालय शिक्षाका समस्या समाधान गर्ने गरि विधेयक आउने जस्तो नदेखिएको महासंघको बुझाइ रहेको सुवेदीले बताए ।