काठमाडौं– भारतीय प्रधानमन्त्री नरेन्द्र मोदीले आफ्नो देशका किसानको हितविपरीत कुनै सम्झौता नगर्ने दृढता व्यक्त गरेका छन् । अमेरिकी राष्ट्रपति डोनाल्ड ट्रम्पले भारतमाथि ५० प्रतिशत भन्सार शुल्क थोपरेलगत्तै मोदीको यस्तो भनाइ आएको हो ।

आफूले भारी मूल्य चुकाउनु परेपनि किसानको हितविपरित कुनै सम्झौता नगर्ने मोदीको भनाइ छ । राजधानी नयाँ दिल्लीमा आयोजित एक कार्यक्रममा उनले अमेरिका वा ट्रम्पको नाम भने लिएनन् ।

बुधबारमात्रै ट्रम्पले भारतले रुससँग तेल खरिदलाई निरन्तरता दिएको भन्दै भारतीय सामानमा थप २५ प्रतिशत शुल्क बढाएर ५० प्रतिशत पुर्‍याएका थिए । यो शुल्क आगामी अगस्ट २८ देखि लागू हुने अपेक्षा गरिएको छ ।

भारतीय विदेश मन्त्रालयले ट्रम्पको यस कदमलाई ‘अत्यन्त दुर्भाग्यपूर्ण’ भनेको छ । मन्त्रालयले राष्ट्रिय हितको रक्षाका लागि आवश्यक सबै कदम चाल्ने पनि उल्लेख गरेको छ ।

अमेरिकाले भारतीय कृषि बजारमा सहज पहुँच चाहेको छ । यद्यपि भारतले अमेरिकाको यस्तो प्रस्ताव अस्वीकार गर्दै आएको छ ।

समाचार संस्था रोयटर्सका अनुसार भारतले कृषि बजारमा अमेरिकालाई पहुँच दिन अस्वीकार गर्ने र रुसी तेल किन्न नछाड्ने भएपछि भारत र अमेरिकाबीच ५ चरणका व्यापार वार्ता अवरुद्ध भएको छ ।