काठमाडौं- नेपाली कांग्रेसका महामन्त्री विश्वप्रकाश शर्माले रास्वपाका सांसदहरुले संसदीय मर्यादा कायम गर्न नसकेको बताएका छन्।

बुधबार प्रतिनिधिसभा बैठकको विशेष समयमा शर्माले संसदीय व्यवस्थामा आफ्ना कुरा राख्ने र समाधान खोज्न सकिने भए पनि अहिले त्यस्तो नदेखिएको बताए । उनले लामो समयदेखि सदनमा आफ्नो कुरा राख्ने र बाहिरिने कामले राष्ट्रिय स्वतन्त्र पार्टीका सांसदहरूले संसदीय मर्यादा कायम गर्न नसकेको देखिएको बताए ।

शर्माले कुनै पनि विषयलाई आवेगमा आएर हेर्न नहुने भन्दै अराजक शैलीबाट मुक्त हुन रास्वपा सांसदहरूलाई सुझाव दिए ।

शर्माले सहकारी ठगी आरोपमा भैरहवा जेलमा रहेका रास्वपा सभापति एवम् पूर्वगृहमन्त्री रवि लामिछानेको पक्षमा भन्दै गरिएको हस्ताक्षर अभियानप्रति पनि प्रश्न उठाएका छन् ।

उनले कुनै पनि अदालतले लामिछानेलाई कसुर नगरेको भन्न सकिने अवस्था नरहेको भनेको उल्लेख गर्दै धरौटीमा छुट्दा न्याय मिल्यो भन्नेले थुनामा पठाउँदा प्रतिशोध भयो भन्न नमिल्ने जिकिर गरे ।

‘रवि लामिछानेले टेलिभिजनमा कार्यक्रम चलाउँदा अदालतको आदेश नमान्नेमाथि कडा प्रहार गर्थे’, उनले विगत स्मरण गराउँदै भने, ‘अहिले अदालतको आदेशविरुद्ध हस्ताक्षरमार्फत् कसलाई दबाब दिन खोजेको ?’