झापा- झापा गाउँपालिका–१, लसुनामा एकजना पुरुषको शव रुखमा बाँधिएको अवस्थामा भेटिएको छ।

बुधबार बिहान ६० वर्षीय जतन सोरेन आँपको रुखमा प्लास्टिकको डोरीले बाँधिएको अवस्थामा मृत भेटिएका जिल्ला प्रहरी कार्यालय झापाले जनाएको छ।

मंगलबार राति अत्यधिक मदिरा पिएका सोरेन छिमेकी महादेव टुडूको घरअगाडि गएर कराउन थालेका थिए । त्यसपछि महादेवसहित स्थानीयले उनलाई नियन्त्रणमा लिई आँपको रुखमा बाँधेर छाडिदिएका थिए।

तर बुधबार बिहान करिब ४ बजे उनी मृत भेटिएपछि प्रहरीलाई खबर गरिएको थियो।

जिल्ला प्रहरी कार्यालय झापाका प्रहरी प्रवक्ता एमव् डीएसपी खगेन्द्रबहादुर खड्काका अनुसार उक्त घटनामा चारजना पक्राउ परेका छन् ।

प्रहरीले मृतककै छोरा २७ वर्षीय अनतलाल सोरेन, छिमेकी ५० वर्षीय महादेव टुडू, २० वर्षीय लुखिराम टुडू र २१ वर्षीय लखिराम टुडूलाई समातेको छ ।

उक्त घटनामा संलग्न केही व्यक्ति अझै फरार रहेको खड्काले बताएका छन् । उनीहरूलाई पनि पक्राउका लागि खोजी भइरहेको उनले बताए ।