काठमाडौं- चीनले इरानबाट प्रतिबन्धित तेल खरिद गरिरहेको पाइएको छ । अमेरिकाको सीबीएस न्यूजले गरेको अनुसन्धानमा चीनले अमेरिकी प्रतिबन्धलाई छल्दै इरानबाट तेल किनिरहेको पाइएको छ ।

यो तेललाई चीनले समुद्रमा जहाजमार्फत ठाउँ ठाउँमा स्थानान्तरण गर्दै लुकाएर ल्याउने गरेको छ । यी जहाजहरूले आफ्नो पहिचान लुकाउन ट्रान्सपोन्डर बन्द गर्ने र जहाजको नाम र नम्बर छोप्ने गरेको पाइएको छ ।

सीबीएसका अनुसार अनुसन्धान टोलीले सिङ्गापुरबाट ८० नौटिकल माइल टाढा मलेशियाको तटनजिक चार वटा जहाजमा स्थानान्तरण भइरहेको देखेका थिए । यसरी तेल स्थानान्तरण गर्नेमा मे महिनामा प्रतिबन्ध लगाइएका स्टेलर ओरेकल र अल्प्स नामक जहाजहरू पनि रहेको जनाइएको छ ।

समाचारमा जनाइएअनुसार इरानले निर्यात गर्ने ८० देखि ९० प्रतिशत तेल चीन पुग्ने गरेको छ । चीनले इरानबाट सस्तो मूल्यमा तेल आयात गर्दै आएको छ । चीन निर्यात हुने तेलबाट आम्दानी भएको पैसा इरानले आफ्नो अर्थतन्त्रलाई चलायमान राख्न र आणविक कार्यक्रममा खर्च गर्दै आएको बताइएको छ ।