काठमाडौं- म्याट्रिक्स फाइट नाइट (एमएफए १७) मा बान्टमवेट च्याम्पियन जितेका रवीन्द्र ढाँट सोमबार भारतबाट काठमाडौं आइपुगेका छन् ।

भारतका साविक विजेता चोङ्गरेङ्ग कोरेनलाई हराउँदै टाइटल बेल्ट जितेका रवीन्द्रलाई त्रिभुवन विमानस्थलमा भव्य स्वागत गरिएको छ ।

शनिबार राति भएको खेलमा उनले साविक विजेता भारतीय चोङ्गरेङ्ग कोरेनलाई तेस्रो राउन्डमै नकआउट गर्दै सनसनीपूर्ण जित निकालेका थिए ।

उनले तेस्रो राउन्डको ५४औँ सेकेन्डमै भारतीयलाई नकआउट गरिदिए । उनले प्रतियोगिता जित्दै एमएफएनको बान्टमवेट श्रेणीको बेल्ट पनि हात पारेका थिए ।

योसँगै ढाँटले आफ्नो व्यावसायिक करियरमा नवौँ जित दर्ता गरेका थिए । यो फाइटका लागि उनले निकै कडा तयारी र मिहिनेत गरेका थिए । त्यो कुरा भारतीय फाइटरविरूद्ध ढाँटको रणनीति सुधार र नवीनताले पुष्टि गरेको थियो ।

ढाँटले इभेन्टको दोस्रो राउन्डमा कोरेनलाई थोरै दबाबमा राखेका थिए । त्यसपछि तेस्रो राउन्डमा कडा र चाँडो आक्रमण गर्दै विपक्षीको बचाउलाई निस्तेज पार्दै नकआउट जित हासिल गरेका थिए । प्रशिक्षक र टिमका सदस्यहरूले पनि उनको उत्कृष्ट प्रदर्शनको प्रशंसा गरेका छन् ।

उनीहरूले यो फाइटलाई नेपालका लागि गर्वको क्षण भनेका छन् । यसले अन्तर्राष्ट्रियस्तरमा नेपाली एमएमएको मान्यता बढाएको छ । यो प्रदर्शनले ढाँटलाई भविष्यमा प्रतिस्पर्धाको लागि नयाँ उत्साह र आत्मविश्वास दिलाएको छ ।

ढाँटको सफलता नेपालका लागि महत्त्वपूर्ण सावित भएको छ । नेपाली खेलकुद क्षेत्रमा नयाँ प्रतिभाहरू आइरहेका छन्, उनीहरूका लागि पनि ढाँट हौसला बनेका छन् ।

तस्बिरहरू : नेपाल फोटो लाइब्रेरी