काठमाडौं– प्रमुख प्रतिपक्षी नेकपा (माओवादी केन्द्र)ले इजरायलमा हमास समूहको नियन्त्रणमा रहेका नेपाली युवा विपिन जोशीको रिहाइका लागि थप कूटनीतिक पहल बढाउन सरकारसँग आग्रह गरेको छ । 

चार दिनसम्म चलेको स्थायी समिति बैठकले गरेका निर्णयहरू सार्वजनिक गर्दै माओवादी केन्द्रले अध्ययनका क्रममा इजरायल गएका विपिनलाई हमास समूहको नियन्त्रणबाट मुक्त गर्नका लागि थप कूटनीतिक पहल बढाउन सरकारसँग आग्रह गरेको हो ।

‘हमास समूहले कब्जामा लिएका विपिन जोशीको रिहाई एवम् मध्यपूर्व लगायतका ठाउँमा रहेका लाखौं नेपालिहरूको सुरक्षाका लागि थप कूटनीतिक पहल बढाउन सरकारको गम्भीर ध्यानाकर्षण गर्दछ,’ बैठकले गरेको निर्णयमा भनिएको छ । 

साउन १६ देखि सुरू भएको माओवादी केन्द्रको स्थायी समिति बैठक सोमबार २६ बुँदे समसामयिक राजनीतिक प्रस्ताव पारित गर्दै सोमबार सम्पन्न भएको छ ।