काठमाडौं– भारत–राष्ट्रसंघ कोषको सहयोगमा अफ्रिकी मुलुक बुर्किना फासोमा बाँध निर्माण परियोजना सम्पन्न भएको छ । कोषको सहयोगमा बुर्किना फासोको पोवा क्षेत्रमा रहेको नियाङ्दो बाँध निर्माण परियोजना सम्पन्न भएको राष्ट्रसंघका लागि भारतीय नियोगले जानकारी दिएको छ ।

यस बाँधबाट सो क्षेत्रमा बसोबास गर्ने ५० हजार नागरिक लाभान्वित हुने अपेक्षा गरिएको छ । यो बाँध परियोजना चार दशकदेखि निर्माणको पर्खाइमा रहेको भारतीय समाचार संस्था एएनआईले जनाएको छ ।

राष्ट्रसंघका अनुसार यो बाँधको क्षमता ५ लाख ८० हजार घनमिटर रहेको छ । यस बाँध निर्माण भएसँगै सो क्षेत्रको ५ हजार हेक्टर जमिन पुनस्र्थापित हुनेछ ।

अनपेक्षित वर्षाले सताउँदै आएको उक्त भूपरिवेष्ठित मुलुकका लागि यस बाँधको निर्माणले लाभ मिल्ने जनाइएको छ । यो परियोजना सन् २०२० मा शुरु गरिएको थियो । यसको निर्माणमा भारत–राष्ट्रसंघ कोषसँगै बुर्किना फासो सरकार र राष्ट्रसंघीय विकास नियोग यूएनडीपीको सहकार्यको पनि साझेदारी रहेको एएनआईले जनाएको छ ।