काठमाडौं– भारतले सिरियालाई मानवीय सहाता सामग्री प्रदान गरेको छ । भारतको विदेश मन्त्रालयले सिरियालाई अत्यावश्यक चिकित्सा सहायता प्रदान गरेको जनाएको छ ।

सामाजिक सञ्जाल एक्समा पोस्ट गर्दै विदेश मन्त्रालयका प्रवक्ता रणजीत जयसवालले यसबारे जानकारी दिएका हुन् । उनले सिरियाली जनतालाई भारतीय मानवीय सहायता जारी रहेको उल्लेख गरेका छन् ।

उनका अनुसार भारतले पाँच मेट्रिक टन अत्यावश्यक औषधि सिरियातर्फ पठाएको हो । यसमा क्यान्सर प्रतिरोधि औषधि, एन्टिबायोटिक र एन्टि हाइपरटेन्सिभ औषधि रहेको भारतीय समाचार संस्था एएनआईले जनाएको छ ।

भारतले द्वन्द्वग्रस्त एवम् प्राकृतिक विपदमा फसेका मुलुकहरुलाई मानवीय सहायता प्रदान गर्दै आएको छ । यसअघि भारतले ल्याटिन अमेरिकी मुलुक बोलिभियालाई ३ लाख डोज दादुरा र रुबेला खोप प्रदान गरेको थियो ।

दादुरा र रुबेला रोगको प्रकोप सामना गरिरहेको बोलिभियालाई सहयोगस्वरुप यस्तो खोप प्रदान गरिएको जयसवालले जनाएका छन् । हालै बोलिभियाका विभिन्न स्थानमा दादुराको प्रकोप देखिएको छ ।