काठमाडौं – नायक दयाहाङ राई स्टारर फिल्म ‘मिरमिरे’ माघ १ गतेबाट प्रदर्शनमा आउने भएको छ । छायाङ्कनरत यस फिल्मको प्रदर्शन मिति निर्माण पक्षले शुक्रबार सार्वजनिक गरेको हो ।

माघ १ गते प्रदर्शन मिति तय भएसँगै यस फिल्मको बक्स अफिस प्रतिस्पर्धा ‘गोबर गणेश’सँग हुने देखिएको छ । हाँस्य कलाकार मरिचमान श्रेष्ठ ‘बल्छीको धुर्बे’को डेब्यू निर्देशनमा बन्ने ‘गोबर गणेश’को प्रदर्शन मिति यसअघि नै माघ १ लाई तोकिएको थियो ।

अर्थात्, बल्छीले डेब्यू निर्देशनमै बक्स अफिस प्रतिस्पर्धाको अनुभव लिने भएका छन् ।

यम शेर्पाको दोस्रो लेखन तथा निर्देशनमा ‘मिरमिरे’को छायाङ्कन काभ्रेमा जारी छ । यस फिल्ममा दयाहाङसहित प्रकाश सपुत र नायिका सिर्जना निङ्लेखु शीर्ष भूमिकामा छन् ।

‘गोबर गणेश’ भने अहिले कलाकार र प्राविधिक चयनकै चरणमा छ । भदौ पहिलो साताबाट छायाङ्कनमा निस्कने तयारीमा बल्छी रहेका छन् ।

यस फिल्मको नायिकामा वर्षा सिवाकोटी फाइनल भएकी छन् । नायक भने चयन हुन बाँकी छ । पदम तामाङ, पुजन घिमिरे, माओत्से गुरुङ र सीतादेवि तिम्लसेना मुख्य भूमिकाका लागि फिल्ममा अनुबन्ध भइसकेको बल्छीले बताएका छन् ।