काठमाडौं– व्यापारिक गोपनियता चोरी गरेको आरोपमा अमेरिकामा एक जना चिनियाँ मूलका शोधकर्ता दोषी ठहर भएका छन् । व्यापारिक गोपनियता चोरी गरेको आरोप लागेका ५९ वर्षीय गोङ चेङ्गुवाङलाई अदालतले दोषी ठहर गरेको अमेरिकाको न्याय मन्त्रालयले जनाएको छ ।

उनले आणविक क्षेप्यास्त्र प्रक्षेपण गर्ने प्रविधि चोरी गरेका थिए । क्यालिफोर्नियाको सान होजे क्षेत्रमा बसोबास गर्दै आएका गोङमाथि ३ हजार ६ सयभन्दा धेरै दस्तावेज चोरी गरेको आरोप लागेको थियो ।

उनलाई क्यालिफोर्नियाको मध्य जिल्ला अदालतले दोषी ठहर गरेको हो । उनले अधिकतम १० वर्षको जेल सजाय भोग्नसक्ने समाचार संस्था एएफपीले जनाएको छ ।

उनीविरुद्ध सजायको फैसला भने आगामी सेप्टेम्बर २९ मा हुने जनाइएको छ । गोङ सन् २०११ मा अमेरिकी नागरिक बनेका थिए ।

उनले सन् २०२३ मा लस एन्जल्स क्षेत्रमा रहेको एउटा शोध कम्पनीमा छोटो समयका लागि काम गरेका थिए । उक्त कम्पनीको पहिचान भने सार्वजनिक गरिएको छैन ।