काठमाडौं – नायिका नीता ढुङ्गानको डेब्यू निर्देशन रहने फिल्म ‘सुख दुःख’मा वरिष्ठ कलाकार मिथिला शर्माको प्रवेश भएको छ ।

फिल्मका लागि मिथिलासँग कागजी सम्झौता भएको नीताले सोमबार सार्वजनिक गराएकी हुन् ।

डेब्यू फिल्ममा मिथिलासँग सहकार्य गर्न पाउँदा नीता उत्साहित देखिएकी छन् । उनले भनिन्, ‘उहाँ (मिथिला) नभएको फिल्म अपूरो हुन्थ्यो । अब पूर्ण भएको महसुस भएको छ ।’

उनले पूर्ण महसुस भएकाे बताए पनि फिल्मका शीर्ष कलाकारबारे जानकारी दिएकी छैनन् ।

फिल्मको निर्मातासमेत रहेकी नीताले अन्य कलाकारबारे जानकारी दिएकी छैनन् । अहिले उनी प्राविधकहरु चयनको काममा रहेको बुझिएको छ ।

नीताको निजी ब्यानर ‘नीता फिल्मस्’बाट यो फिल्म बन्ने बताइएको छ ।

नीताले निर्देशन गर्न लागेको फिल्म ‘सुख दुःख’ नयाँ नाम होइन । सन् २००४ मा यही नाम गरेको नेपाली फिल्म प्रदर्शनमा आएको थियो ।

उक्त फिल्मको निर्देशक र लेखक शिव रेग्मी हुन् । स्वर्गीय नायक श्रीकृष्ण श्रेष्ठ र झरना थापा यस फिल्मको शीर्ष भूमिकामा थिए । मिथिला शर्मा त्यस फिल्मको मुख्य भूमिकामा थिइन् ।

‘सुद दुःख’ प्रदर्शनमा आएको २१ वर्षपछि सोही शीर्षकको फिल्ममा मिथिलाले अभिनय गर्ने भएकी हुन् ।

यो फिल्मको छायाङ्नक चाडै सुरु गर्ने योजनामा नीता रहेकी छन् । ०८३ सालको दशैँलाई प्रदर्शन मिति तोकिएको छ ।